नवी दिल्‍ली- मितभाषी म्हणून ओळखल्या जाणारे माजी पंतप्रधान व काँग्रेसचे ज्येष्ठ नेते डॉ.मनमोहन सिंग यांनी पंतप्रधान नरेंद्र मोदी यांच्यावर कमीत-कमी शब्दांत जोरदार हल्‍लाबोल चढवला आहे. मपंतप्रधान नरेंद्र मोदींनी आपल्या आचरणातून सर्वांसमोर चांगले उदाहरण प्रस्थापित केले पाहिजे. त्यांची वागणूक पंतप्रधानपदाच्या नैतिकतेला अनुरुप असायला हवी, असा सल्‍ला डॉ.मनमोहन सिंग यांनी पंतप्रधान मोदींना दिला आहे.

माजी केंद्रीय मंत्री मनीष तिवारी यांच्या फेबल्स ऑफ फ्रॅक्चर्ड टाइम्सफ पुस्तकाच्या प्रकाशन सोहळ्यात ते बोलत होते. डॉ.मनमोहन सिंग म्हणाले, पंतप्रधानांना माझा सल्‍ला आहे की, त्यांनी संयम बाळगून पंतप्रधानपदाची प्रतिष्ठा राखावी. सध्या सार्वजनिक व्यासपीठावर बोलताना प्रचाराची पातळी घसरल्याचे पाहायला मिळत आहे. पंतप्रधान म्हणून जेव्हा मी भाजपशासित राज्यांचा दौरा करत होतो. त्यावेळेस भाजपच्या मुख्यमंत्र्यांबरोबर माझे चांगले संबंध होते. मध्य प्रदेशचे मुख्यमंत्री शिवराजसिंह चौहान यास दुजोरा देतील. यूपीए सरकारच्या काळात भाजपशासित राज्याबरोबर मी कधीच भेदभाव केला नाही, असेही त्यांनी सांगितले.